प्रत्यक्ष कृती

प्रत्यक्ष कृती !
महाराष्ट्रातील दुकाने, संस्था व आस्थापने यांच्या नावांचे फलक मराठी भाषेत असावेत, अशी सरकारची अधिसूचना असतांना राज्यात त्याचे पालन होत नाही. मातृभाषेचा विकास होण्यासाठी ज्या काही गोष्टी आवश्यक आहेत, त्यांपैकी राज्यातील संस्थांचे नामफलक राज्याच्या राजभाषेत असणे महत्त्वाचे आहे. शिवसेनेने मराठी भाषेच्या वापराबद्दलची त्यांची भूमिका ठाम ठेवली आहे आणि त्याचा प्रत्यय दोन दिवसांपूर्वीच शिवसैनिकांनी केलेल्या प्रत्यक्ष कृतीतून आला. माहीम येथील `बाँबे स्कॉटिश' शाळा, बोरीबंदर येथील `बाँबे हायकोर्ट' व प्रभादेवी येथील `बाँबे डाइंर्ग' या तीन आस्थापनांच्या नावांतील `बाँबे' या शब्दाला त्यांनी आक्षेप घेतला. `बाँबे स्कॉटिश'च्या चारही दरवाजांपाशी जाऊन नामफलकातील बाँबे या शब्दाला काळे फासले. `बाँबे डाइंर्ग'च्या बाबतीत शिवसैनिकांनी तशीच कृती केली व `बाँबे हायकोर्ट'च्या बाबतीत पोलिसांच्या हस्तक्षेपामुळे शिवसैनिकांचा कार्यक्रम बारगळला. कलकत्त्याचे कोलकाता चालते, मद्रासचे चेन्नई चालते, मग बाँबेचे मुंबई का नको, हा शिवसैनिकांचा प्रश्‍न आहे. महाराष्ट्रातील काँग्रेसच्या सरकारकडे याचे काय उत्तर आहे ? कि मराठी भाषेची अवहेलना आणि द्वेष हाच त्यांचा कार्यक्रम आहे ?