मराठीद्वेष्ट्या काँग्रेसची निवडणुकीची माहिती देणारी यंत्रणा इंग्रजीतून

मराठीद्वेष्ट्या काँग्रेसची निवडणुकीची माहिती देणारी यंत्रणा इंग्रजीतून !
मराठी मतदारांना इंग्रजीतून माहिती देणारी यंत्रणा उभारून त्यांची गैरसोय करणारे मराठीद्वेष्टे काँग्रेस शासन !
17-09-2009

-->
मुंबई, १७ सप्टेंबर - निवडणुकीची माहिती सर्वांपर्यंत पोहोचावी यासाठी जिल्हाधिकारी कार्यालयातून `महाराष्ट्र टेलिफोन निगम लिमिटेड'च्या सहाय्याने माहिती पुरवणारी एक मदत यंत्रणा (हेल्पलाईन) कार्यरत करण्यात आली आहे.
मात्र यावरून इंग्रजीतून माहिती देण्यात येत असल्याने मतदार, विशेषत: ग्रामीण भागांतील नागरिक नाराज आहेत. (भारतात इंग्रजी बोलणार्‍यांचे प्रमाण केवळ अल्प असतांना इंग्रजीतून माहिती देणारी यंत्रणा बसवणारे शासन अजून इंग्रजी भाषेच्या गुलामगिरीतच वावरत आहे ! - संपादक)`१२९० हेल्पलाईन' या मराठीचे वावडे असणार्‍या निवडणूक मदत यंत्रणेतील सर्व कर्मचारी हे मतदारांनी माहिती विचारल्यावर त्यांना इंग्रजीतून उत्तरे देतात. बहुतांश जण इंग्रजीच्या मार्‍यामुळे या यंत्रणेवरून माहिती घेण्याचे टाळत आहेत. मराठीत माहिती दिल्यास या मदतयंत्रणेचा उद्देश सफल होईल, असे मतदारांचे म्हणणे आहे.याबाबत मुंबई जिल्हाधिकारी कार्यालयात या यंत्रणेची जबाबदारी सांभाळणार्‍या वरिष्ठ अधिकार्‍यांनी सांगितले की, आम्ही कर्मचार्‍यांना निवडणुकीच्या माहितीचे प्रशिक्षण दिले आहे. भाषेच्या मुद्यापेक्षा मतदारांना योग्य माहिती देणे हा यंत्रणेमागील उद्देश आहे. (मतदारांना उत्तरे मिळण्याचे माध्यमच गैरसोयीचे असेल, तर काय उपयोग ? - संपादक) मराठी उत्तरे देण्याच्या सूचना आम्ही देऊ. (हे पूर्वीच का नाही केले ? - संपादक)